منتخب الوطن وشبيجة ومذيع بوق

الحدث
هو مباراة المنتخب السوري في الدور الثاني لتصفيات كاس العالم ضد طاجيكستان والتي تقام في الأردن نتيجة للوضع الحالي من عدم الاستقرار داخل سوري.

شاء القدر ان تكون هذه المباراة منقولة على الفضائية السورية ولأنه الوطن الذي ينزف دما اليوم ولأنه الوطن الذي نعشق قلت في نفسي يالله يا ولد كلهم ساعة ونص تحمّل شوي والمهم نفوز…

مع مشاهدة المباراة، كان لا بد او بالأحرى لا مفر من قراءة الشريط الأخباري، كما كان لا بد من سماع تعليقات العزيز دوما جوزيف بشور هذا المذيع الخشبي الذي تقشعر لصوته الأبدان…

• تبدأ المباراة جوزيف يتكلم، تخرج صيحات بعض الشبيحة المرافقين للمنتخب ابو حافظ أبو حافظ يصمت جوزيف فجأة ليتركنا نستمتع بالهتاف أبو حافظ أبو حافظ أثناء الهتاف تمر الكاميرا صدفة على المنصة الرئيسية ليظهر علينا الخشبي الارهابي الرفيق فاروق سرية رمز النظام والفساد الرياضي هيدا اللي ما معو غير سادس وسرق ونهب وأهان كتير رياضيين سوريين ولساتو بمنصبه لانه “مصلحة الوطن فوق كل شي يا كلاب”

  اسألوا عن فاروق سرية ولغته بتفهموا جملتي الأخيرة، جوزيف يعود ليقول الشعب السوري يؤكد من جديد وقوفه مع الوطن وقائد الوطن وقائد المسيرة السيد الرئيس بشار الأسد…انو معقول لهون؟

• في الشريط الاخباري وزارة الداخلية تدعو الشعب السوري وجميع المواطنين الصالحين الى الإبلاغ عن كل الارهابيين والمخربين الذين يتسترون بالمظاهرات للقيام بعمليات التخريب  وترويع المواطنين، يا جماعة من كل عقلكن مفكرين الشعب السوري مصدق انو الناس فكوا سكة الحديد وانو ما انتو وشبيحتكن وراها؟ ومن كل عقلكن مفكرين الشعب السوري رح يشتغل عوايني بعد ما صاروا عواينية كل الحارات معروفين ومنبوذين حتى من ولادن؟؟؟
• السفير الروسي في سلوفاكيا يجدد دعمه للإصلاح في سوريا الذي يقوده الرئيس الأسد، عفوا مين مين؟؟ السفير الروسي في سلوفاكيا؟ هلأ هيدا خبر بيستاهل تحطوه على الشريط الإخباري مثلا؟  لهون وصل ضعفكن واستجداءكن لموقف داعم؟؟
• نائب رئيس الجمعية الروسية للتضامن مع بلدان اسيا وافريقيا: ما يجري في سوريا هو تحريض من الولايات المتحدة وهو مؤامرة على سوريا، بالله عليكن معقولين انتوا؟ هية الرجالة بتشجع مين يا وديع؟
•  أكلنا كول التعادل، توقعت اسمع هتافات لرفع الحالة المعنوية للمنتخب وفعلا بدأ الهتاف بالثالوث المقدس الله سوريا بشار وبس، يردد خلفهم الببغاء الإمعة جوزيف بشور الله سوريا بشار وبس، أبو حافظ أبو حافظ، ينتشي جوزيف ينتشي ويطير ويقول الشعب السوري يدعم  الوطن وقائد الوطن وقائد المسيرة…لك يا ابن الحلال أكلنا كول تعادل شو بدنا هلأ بقائدك وحبيب قلبك يعني انت مع مين وشو جاية تعمل اليوم؟
• تشييع جثمان الشهيد المجند غدير العلي الذي استهدفته التنظيمات الارهابية المسلحة في حمص في محافظته طرطوس؟؟

  انو الله يرحم الشهيد ان كان بالفعل شهيد بس لايمتا رح يضل نفسكن طائفي تحريضي؟ طيب شو منشان 1700 مدني سوري انقتلوا برصاص الغدر ليش يا ترى ما بتحطوا اسمائن على الشريط الاخباري؟

• المنتخب يستمر بالتعادل الذي هو بطعم الخسارة ولا زال المشجعون يهتفون ابو حافظ ابو حافظ الشعب يريد بشار الأسد، الله سوريا بشار وبس، الى الابد الى الابد يا بشار الاسد،  واخر همهن المنتخب او نتيجة المنتخب
• دعما لبرنامج الإصلاح…سوق لتجار في اللاذقية يقيم مهرجان للتسوق بين 23 و 28 الشهر الحالي… انو الناس شايفة تاكل لتنزل تتسوق..خليكن ورا هالنظام حتى تسقطوا معو يا تجار الدم
• وأنا اشاهد المباراة تساءلت يا ترى الحمصي فراس الخطيب من الخالدية الا من البياضة؟ لا لا هوة وجهاد الحسين

  من القصور، طيب برهان صهيوني  من الجسر الا من ادلب وكفر نبل تحديدا؟ اي اي تذكرت محمود امنة من سيف الدولة بحلب  وعبد الرزاق الحسين بيته بالبناية الكبيرة بساحة سعد الله الجابري، لك صحي  كاوا حسو ياا ترى من عامودا بقامشلو الا غويران بالحسكة.؟  جورج مراد لاعب مغترب سوري هوة جاب كولنا الأول باينته شاب لعيب وصغير و موهوب، يا ترى رجا رافع من برزة الا من الميدان؟ لا ولو يمكن من حرستا بس بتعرفوا شكله بيشبه شباب ركن الدين

• كول تاني لسوريا رجا رافع المنحبكجية عفويا صاروا يصرخوا سوريا سوريا سوريا نسيوا الصنم ولكن فجأة انقلب الهتاف بالروح بالدم نفديك يا بشار
• اصابة اربع فلسطينيين واعتقال اربعة اخرين في عملية قمع اسرائيلي لمسيرات مناهضة للجدار والاستيطان، يا لطيف شو متوحشين هالاسرائيلية لك اخص عليهم بس ويا حيف
• خلصت اللعبة وفازت سوريا العظيمة، فازت سوريا الحرة فورا طفيت التلفزيون وشغلت فيروز بركي بينضف راسي من هالسموم اللي شفتا وسمعتا

ملاحظة : كل الاخبار التي ذكرتها موجودة الان على الشريط الاخباري على الفضائية السورية بإمكان الجميع يقرأها

بقلم : Mohannad Shaweesh – فيسبوك